1Jo 3 | DOB | STEP | 'Abo'ada 'eguma Yaubada 'enega tatubuwa, tauna 'ida 'awanatuneda. Gete 'ina oboboma sinabwa wawasae manuda. Ona'ai'aila, me bale'u Yaubada nigeya simwalamwalatoni, 'enega me bale'u geya'abo si'ina'inaneda 'aene 'abo'ada Yaubada natunao.

1 John 3

1 'Abo'ada 'eguma Yaubada 'enega tatubuwa, tauna 'ida 'awanatuneda. Gete 'ina oboboma sinabwa wawasae manuda. Ona'ai'aila, me bale'u Yaubada nigeya simwalamwalatoni, 'enega me bale'u geya'abo si'ina'inaneda 'aene 'abo'ada Yaubada natunao. 2 Gosegwao, gete tuga Yaubada 'i'awanatuneda be ma'etamo to'ase 'iapwesa 'edaya? Nate namo tamwalamwalatoni 'aene 'ina ilalimanama 'enaya 'ana 'ita tauna tada 'ita, ta 'abo'ada 'ada 'ita 'iesa'u gelasedi be tauna nadigega.

3 'Ida emisa yage gete manuna 'enega 'ida bubuna tagie'esasedi, nadigega Keliso.

4 Ta esi toto'umalidi Yaubada 'ina loina sile'oale'oa, nate bubuna to'umalina. 5 Ta wate tamwalamwalatoni 'aene Keliso nina 'imai 'ida bubuna to'umalidi sabi 'ewayauledi, ta tauna nigeya 'ebweu wate 'ina to'umalinamo. 6 'Enega 'eguma 'abo'ada Keliso ma'edai tamiyami geya'abo wate tabuubuna to'umalina, ta esi taudi toto'umalidi nigeya Keliso si'ita'ita, ta wate nigeya simwalamwalatoni.

7 Natugwao, geya'abo e'ita kabokabo wamulimuliye, ta esi nuwami sida sabwalena 'aene 'abo yaisigedi taudi 'idi bubuna bobo'ana, taudi nate tobobo'adi, nadigega Keliso. 8 Ta toto'umalidi nate taudi Seitani 'ina bodao, manuna gimituta 'enega ga batuwa Seitani tauna toto'umalina. 'Enega Yaubada Natuna 'ietunena ga bale'uya 'imai Seitani 'ina guinuwao sabi 'ausepaledi. 9 'Enega wate 'eguma Yaubada 'enega tatubuwama geya'abo taguiguinuwa to'umalina, manuna bubuna auwauna 'atedaya ni'atu 'isa'una, 'enega 'abo'ada Yaubada natunao nigeya sawesawenaya be to'umalina wate taguinuwe.

10 'Enega taudi ta'inanedi 'aene yaisigedi Yaubada natunao, ta yaisigedi Seitani 'ina bodao, manuna taudi Seitani 'ina boda geya'abo sa'i siguiguinuwa palupalu, manuna nigeya situbutubuwama Yaubada 'enega, ta wate geya'abo sieobooboboma matasidiyao.

Oboboma gosedao 'ediya

11 Emataluwa sinabwana gete 'agimi eonemi 'aene gosedao maibo'adi tada obobomedi. 12 Ta geya'abo Keni nadigega, manuna Keni nina Seitani 'ina boda, ga tasina 'iununa. Ta 'ina loemwamasa 'alena tuga e'ipi'ipi, manuna tasina 'ina guinuwa bobo'ana ta Keni nina 'ina guinuwa to'umalina. 13 'Enega tasigwao, geya'abo wanuwanuwa owana 'abo me bale'u sietalauwaleda. 14 Ta tamwalamwalatoni 'aene mwawasa 'ina sena ni'atu taebesinena, manuna 'atedega gosedao taoboobobomedi, ga yawasida ataya ni'atu talobena. Ta 'eguma yaisigedi taudi nigeya oboboma 'atediya, taudi tuga ma'etamo mwawasa 'ina sena 'ena simiyami. 15 Ona'ai'aila, 'eguma yaita tasina 'ietalauwale, tauna toloemwawasa tuga, ta wamwalamwalatoni 'aene geya'abo taudi toloemwawasa nidi yawasidi ataya silobaloba. 16 Ta wate oboboma tamwalatonina, nate 'aene Keliso yawasina 'itagwalena ga manuda 'imwawasa, 'enega 'ilobweneda wate be yawasida tatagwale tasidao manudi.

17 Wada nuwa'i'isi 'aene 'eguma yaita toesaesa 'imiyami, ta gosiyana 'ebweu 'imiyamwau, be 'eguma nigeya 'ebweu wate lema 'i'ebwa'ebwa'e, mwa'adega Yaubada 'ina oboboma 'atenaya? Nigeya.

18 Natugwao, geya'abo 'ida oboboma ona namo 'enega, ta esi 'ida guinuwega be tada oboboma 'ai'aila.

Geya'abo tamatamatauta Yaubada matanaya

19 'Eguma 'ida guinuwega taeobooboboma, gete 'ena tamwalamwalatoni 'aene e'ita 'ai'aila 'ena tamiyami, be geya'abo tamatamatauta Yaubada matanaya. 20 Ta 'eguma ma ida 'atesa'ala 'aene 'abo'ada toto'umalida, Yaubada 'atesa'ala nidi 'ida kweudi, manuna yage yauna sawesawenaya, ta wate mwalatoi maibo'ana 'isinapudi.

21 Gosegwao, 'eguma nigeya 'ida 'ebe 'atesa'alamo, kapekapeyana be ta'atepatu Yaubada matanaya, 22 be 'abo to'ase taside 'enaya 'ida 'ebwa'eda, manuna tauna 'ina loinao taematamatanedi, ta 'ida guinuwao manudi 'igwausowala. 23 Ta 'ina loina 'eluwa nidi 'aene Natuna Yesu Keliso taemise, be gosedao taobobomedi, nadigega Keliso nina 'ada loina 'i'ebwa'eda.

24 'Enega 'eguma 'ina loinao tamulimuliyedi, 'abo'ada 'enaya tamiyami, ta tauna 'edaya 'imiyami. Ta mwa'adega 'ina miya 'edaya tamwalatoi'ese? Manuna Yaluyaluwana 'i'ebwa'eda, ga 'edaya 'imiyami.